|
Sprook utwähl'n - Hochdüütsch: 
Plattdüütsch:
|
||||||||||||||||||||||||
|
De Döschkassen - Lütte Geschichen op Platt... Siet fief Johr schriev ick nu eenmol in de Week mien plattdüütsche Kolumne "De Döschkassen in de Dithmarscher Lanneszeidung. Op veelfachen Wunsch vun de Lesers, heff ick nu de scheunsten Geschichen as Book rutbröcht.  Book bestell'n ________________________________________________________________________________ Uttoch: Knackis un annered Eeten (Döschkassen ut’n Januar 2015) Morn is weller Weekenenn. Dusende Lüüd löppt denn weller no’n Backer un wüllt Rundstücken kööpen. As ick noch lütt un de D-Mark noch dor weer, heff ick jümmers an Sünnobend in’t Dörp lopen musst, üm Rundstücken to kööpen. Sünndags, so as hüüt, geev dat dormols keen Rundstücken. Weer je Weekenenn. Dat gung denn so: „Moin, ick harr gern süss Rundstücken un de Zeitung.“ Un denn heff ick süss Rundstücken un de Zeitung kreegen. Wat ook sünst. Dor heff ick je ook no frogt. Hüütigendoogs gifft dat overs al lang keen Backer mehr, wo man Rundstücken kööpen kann oder „Brötchen“. Hüüt heet de Dingers „Backis“, „Knackis“, „Brunos“, „Schlemmerstange“, „Lattenkracher“ un al sowat. Overs worüm blots? Weer „Brötchen“ oder Rundstück ni mehr good genog? Hangt dat mit den Klimawannel tosom? Wenn ick Rundstücken hebben will un „veer Knackis bidde“ seggen schall, denn kom ick mi doch sülms meist vör as so’n Knacki. Nä, nä. Wenn ick Rundstücken hebben will, denn frog ick no Rundstücken. Overs denn mark ick jümmers, dat de Verklöperin ganz hibbelig ward: „Ääh, wüllt se Weltmeister, Roggenkrüstchen oder wat? Zungenkuss is jüst in Angebot.“ Ward de Dorsten dorop schoolt, so’n drulliged Tüch to sabbeln? Gift dat Utbillungslogers för de Lüüd, wo se üm kort no süss övern Hoff marscheern mööt? Klock acht övt se denn Lattenkracher un Zungenküsse ünnert Volk to bringen. De doht mi richti leed. Man kann sick Rundstücken je ook al fix un fertig mit Wuss oder Kees belegt kööpen. Overs denn heet se nochmol anners: „Grünschnabel“ oder „Schlemmerecke“. Sogor op de Tanksteed gift dat sowat. Dor heet dat „Supersnack“. Dor brukt man ’n Vokabular as so’n Perfesser – blots üm to fröhstücken. Veelicht gift da je bald ook ’n Rundstück-Abonnement. Dor betohlt man 25 Euro in Monot un kriegt denn jeden Morn twee Rundtstücken. Dat nennt sick denn wohrschienli „Knacki-Flatrate“ oder so. Haueha. Wenn ick wusst harr, dat dat Eeten mol so’n fiegeliensche Sook ward, denn weer ick al lang op Drinken ümsteegen. ________________________________________________________________________________ Düsse un veele annere Geschichen över de Tücken, de dat in Alldag gifft, finnd Se in mien lütted Book. Druck un Verlach: Books on Demand, Norderstedt 152 Sieden |
|||||||||||||||||||||||
| Zugriffe gesamt: 9084
Tel.: 0 48 59 / 6 24 Mobil: 01 62 / 24 70 562 - E-Mail: kontakt@heiko-kroll.de  | ||||||||||||||||||||||||